Rangitāne o Tamaki nui a Rua

Te Oriori mo Whakaewa-i-te-rangi

Uiui noa au e Hine ko wai tou ingoa

I kawea ai koe e ō mātua ki te wai tū ai

Māku e tapa atu i te ingoa o tō tupuna

Whakaewa-i-te-rangi e Hine

Noho mai e Hine i roto i te whare Taiwhētuki

I te whare nō tūārangi ka patua e Tāne

Hei topetope i āna toko

I a Toko-huri-nuku, i a Toko-huri-rangi

I a Rākau-tuke, i a Rākau-koki

Ngā toko e Hine

I tokona ai te rangi runga nei

Rere te maramara o Te Āwhiorangi

Ko te toki tēnā i topetope ai ngā ngaru

Kii te tangata nā wai rā e?

Māu e kii atu nā te Kāhui Pou

Nā Pou-titi nā Pou-tāhae nā Pou-kōrero

Nā Kahu-taringa i tiki ki roto o Wharekura e Hine e

Tikina atu i te wao ngahere o Pukupuku

I reira Rïwaru te waka kai tangata

Pü ai ngā were tuhi-ki-te-rangi

Ka noho o Wahiaroa i a Tango-rau-tāwhiri

Ka puta ki waho ko te hākui o Rata

Ka patua i reira te Kāhui Matuku

A Matuku-hungae a Matuku-e-hue a Matuku-tangotango

A Kiore-nui a Kiore-roa a Kiore-kotokoto

I tangihia ai i te Wairere e Hine

Ki āu e Hine koe wahine tū-te-ihonga a Whaitiri-mātakataka

Nāna i whakanoa te rangi runga nei

Ka heke ki raro rā ki a Kai-tangata

Kauaka e Hine e noho i te nohoanga i o tāina

Kei kiia mai koe ki te whakarau

Māu e kii atu koe whakarau hoki a Nïwha

Kauaka ia e whakamōmori ai Rongomai

Ka paea ki uta rā ki Tāhuna-tapu e Hine e

E ui te tini o Makehu ki runga Kaiwhakamaire

Tērā i tōna kiri he puku he mira he toka-tū-moana

Ngā takitaki o ō tupuna i a ia e Hine e

Inā hoki te rangi o ngā tāne

Tipapa kino ki roto te wai

Ka inu i te tātea o Pua o Tatūto

Mei kore ake te Ara-tauwhāiti-a-Tāne

Ka puta ō matua ki te whaiao

Ki te ao mārama e Hine e

Kauaka e Hine hei rehia ki te whare o te tuna

Ka pā e Hine he rau tïkumu

Mō te piki rae o te ika o Ngahue

I haramai ai i Te Angaia e Hine e

Nekeneke e Hine ki te aroaro o tō tupuna

O tō hākui, o Hurunga-i-te-rangi

Whakarongo ake ai ki te māturutanga

Kia mama te whē ka mama te rō

Ka mama te ara o Tukutuku-pūngawerewere

Ka mama te whakairo ka mama te tāniko

Ki a Hiri-i-roto-ra ki a Mahara-i-roto-ra

Ki te whatu kākahu tāngaengae

Ki te whatu pōkeka tāngaengae

Koi ūhia koe ki te ngenepara

Ehara e Hine Aka-rīnoi nā te Aka-rītaha

Nā Tawharatia-iho nā Tū-rāhui-raro

Nā Nuku-mai-tore e Hine e

Kāore e Hine he putanga ki te tonga

Nōu anake rā te putanga ko Whakaewa-i-te-rangi

Nāna i whiu mai ko Tupuaki ko Poutini

Ko Arahura te wā i tere ai te toki

Ka kitea i reira e tuhi ana e rapa ana

I raro i te whatu kura o Tangaroa

Ko whatu-uira rā tēnā ko whatu-kārapa rā tēnā

Ka heua e Rua-tumata-kurukuru Tumata-ka-rere

Homai whakapiritia ki te tuāhine

Ki a Hine Tū ahōanga hei oro i te toki

He pua tōtara kauorohia he pua tōtara kauorohia

Kauorohia te Āti-tipua kauorohia te Ati-tāwhito

Hei whakakoi rā e Hine i te mata o te toki

Hei tuatua i te wao a Tāne

I te maramara o Tūkau

I te tama i ara nā Mūmūwhango

Hei waka mō tāua i whiti ai täua

Ki tāwāhi o te awa e Hine e